Ultimo aggiornamento  05/09/2010 23.53

Nonostante è da diversi anni che vivo lontano da Motticella non ho mai smesso di parlare il nostro dialetto sfruttando ogni occasione quando mi ritrovo  con dei "paesani", quindi voglio dedicare alcune pagine del sito proprio al nostro dialetto che per me rimarrà la mia prima "lingua".

Ho chiesto al Prof. Mollica se mi avrebbe dato una mano in quanto so che lui come me ci tiene tanto al nostro dialetto ed è un profondo conoscitore dei dialetti calabresi in particolare quello motticellese.

Come speravo subito mi ha scritto una  lettera e con immenso piacere la pubblico:

Caro Angelo, il tuo invito a scrivere qualche pagina sul sito che hai voluto fare su Motticella, mi ha colto di sorpresa, perchè sto finendo il mio secondo libro che avrà come titolo "PER NON DIMENTICARE MOTTICELLA". Parlerà, oltre dei ricordi della mia giovinezza, ancora d'usanze e cambiamenti avvenuti nella nostra società.

Che tempi, caro Angelo e per ricordarli a te e ai tuoi lettoriche sono certamente motticegliani ho pensato di farlo in dialetto: chigliu di paisi vicini a nnui.

Incomincio col ricordare la festa più importante, quella della Patrona.

A festa da Madonna da Nunziata cadi u vinticincu du misi i marzu e chist’annu (simu nto dumila e cincu), cadi puru a Santa Pasca. Quandu e me tempi capitava u stessu chi capita oi, a festa da Madonna si rimandava dopo quindici o venti iorna, ma si facia! Ora pe rispettari u calendariu ti cuntu chigliu chi succedia pa festa da Madonna. Intanto si ncuminciava ca novina, si dicia u rosariu nta cresia, u previti facia a benedizioni cu Santissimu e poi i fimmini cantavanu na canzuna chi ancora mi sona nta memoria. Ta trascrivu pecchi si chisti pagini i lei cocchiunu chi ndavi l’età mia si ricorda  i quando u paisi era paisi, pecchi ora restaru pochi famigghi e tutti vecchi comu a mmia.

Bona sira vi dicu a Vui Madonna  

O gloriusa Vergini Maria!

Supra all’artari c’è ‘na gran Signura,

Maria di la Nunziata ca si chiama.

Cu cerca grazzii iglia ‘nci duna.

Eu Madonna Vi ‘ndi cercu una,

Pecchi Vu siti a riggina di tuttu lu mundu:

Mi ‘ndi ‘ncumpagnati a notti e lu iornu:

Lu iornu comu iamu pe la via,

La notti pammi si passa in santa paci.

Ora nui ‘ndi iamu cu u cori filici

Ca vu siti ‘ncumpagnata cu l’angiuli santti.

E a Madonna si vota e ‘ndi dici:

Vaiti bona sira e santa paci!

Chisti belli palori cantati, cu devuzioni, supra a ‘na musica china di malinonia parinchivanu a nostra povera cresia e si spandivanu ‘nte rughi e accussi cu non potia iri pa novina cantava ‘nta casa! Chi tempi!

Siccomu u paisi era poveru non si cogghivanu assai sordi pa festa e allura facivanu i veni a banda Pilusa i Samu e u bravu fochista Peppinu Minasi pammi spara a batteria, i scirfalora, i rotegli, i corpa culurati nto celu e pammi balla u cavagliu ca era u cchiu grandi divertimentu pa nnui cotrari.

Forzi tanti no sannu, ma a matina da vigilia, u vintiquattru, a Mbiata Vergini venia ncumpagnata in processioni ( quanta genti nc’era arretu a statua!) finu a cresia du campusantu. E cca succedivanu cosi i ll’attru mundu, pecchi si ia pa festa, ma nc’erano puru i morti chi venivanu ciangiuti. Attri tempi! A Madonna era sempri in cumpagnia pecchi ndavia a chigli chi facivanu gutu e stavanu tutta a iornata. U iorno dopo, verzu o tardu, ncumiciava a prucessioni pammi si porta a Madonna nta cresia du paisi e chista era pa nnui cotrari na festa nta festa,  eramu cuntenti picchi ndavivamu a panza china. Ndi scialavamu i vidimu, quandu facia scuru, i scirfalora e i rotegli i Minasi chi ivanu nto celu dassandu strisci i focu e poi sparavanu e quandu mandava in aria chigli bumbi chini i tanti culuri e sparavanu botti forti cincu sei voti. Mi sperdivi i vi dicu ca pammi  si portava a Madonna si facia l’incantu, comu si fussi na cosa mentuta all’asta. Era nu grandi onori cu vincia cu sordi o cu granu o cu ogghiu.Era rrobba chi i procuraturi, chigli che organizzavanu a festa, sa vidivanu cu previti e pagavanu i debiti.

Giuvani e vecchi a Zimbariu ballavanu cu l’organettu e tamburegliu o puru chi ciaranegli: nc’era u mastru du ballu cu muccaturi o cogliu chi ogni tantu gridava:”fora o primu!”

Ma chigliu chi i giuvani motticegliani chi sunnu sparsi po mundu e si fannu onori non sannu e che ‘nc’era puru a povertà tanta povertà, ma chigli iornu cu l’aiutu da Madonna da Nunziata nta tutti i casi si mangiavanu  i maccarruni e a carni.

Ora sunnu tutti vecchi chigli chi sunnu nto paisi e a processioni non esti comu na vota ma na preghiera rivolgimu a Mbiata Vergini i sarva u paisi e mi duna saluti a tutti quanti!

Alla prossima se volete che continuo! Ciao a tutti!

Aggiungo un augurio di Buon Natale 2005 che il Professore vuole fare a tutti i motticegliani con cui mi associo anch'io.

Mmancanu pochi iorna pa Natali e tanti ricordi mi venanu a menti. Vogghiu pammi i cuntu accussi chigli chi no nsunnu da me generazioni ponnu sapiri chigliu chi si facia nte iorna ch'eranu prima da festa. Versu i quattru da matina u previti sonava i campani pa missa da novina e siccomi era tempo i friddu ndi ccucciavamu nte sciarpi i lana: i nostri mammi ndi carricavanu i robi pammi stamu cardi. quandu sonava a terza campanata si sentivanu i ciaramegli du bonanima du massaru Micu Tudiscu cu so figghiu Ntini chi sonava u tamburegliu chi si vvicinava a chiesia. U previti Todaregliu di felici memoria sonava na ciaramegliota cu ll'armoniu e nuatri cotrari ndi scialavamu. Poi i fimmini cantavanu a canzuna da zingareglia e quandu finia cominciavanu cu Tu scendi dalle stelle.....

Ma u cchiu bellu venia a vigilia i Natali, pecchi si ccendia u focu davanti a chiesia e i ligna i grandi (i giuvanotti) ivanu e robavanu fascini i rami e pezzi i ligna i vrivara ncatastati a sira prima nda posti mmucciati. Era nu divertimentu e si spettava a mezzanotti pammi basamu u Bambinegliu chi u previti mentia nto prisepiu. Poi si ia a casa e cu ndavia roba mangiava e cu no ndavia mangiava puru pecchi eramu tutti na famigghia. Attri cosi faciti pammi vi cuntano i vecchi da vostra famigghia. Bon Natali e bon Capudannu cu l'auguriu i siti sempri sereni e i bona saluti.

Vi vogghiu beni e v'imbrazzu Pascalinu Muglica u figghiu i mastru Vicenzu e da gnura Micuzza.